Tombalu, di Laure Vincenti

- « O mà, tombalu ».

Ùn ne possu più di u so rispiru sfiatatu quand’ella vene l’ora di minatti.

Ti trascini, ti vultuli, ti cincini, mi pari tuttu iss’insettu grisgiu cù a chjoppula scura chì m’amusava tantu tandu.

Ti n’arricordi o mà ?

Un mignoculu. Era un mignoculu. L’insettu sì tù oramai.

Certe volte, mi falave in piazza per fughjelu. Mi dicie ch’ellu ci vulia à ghjucà à cuntà e farfalle bianche. Ognitantu e giale, più scarse.

Ma eo preferia i mignoculi, mi facianu ride cù a so manera d’imbucinassi nant’à elli tempu ch’avvicinava un ditu di u so curpucciu ripugnevule.

- « O mà, tombalu ».

Issi lagnulimi quand’ellu ti inciacca, mi danu guasi u vomitu. Mi piacerebbi tantu à chjode l’ochji è ch’ella smarisca. Ma quandu facciu u neru ingiru à mè vecu solu i mignoculi chì mi trascinanu addossu ùn vegu mai e farfalle provu a ti ghjurgu o mà ma ùn a ci facciu a ghjurgu nant’à u mo capu di zitellu.

- « O mà, tombalu ».

Ogni colpu chì ti spella disceta e nostre notti. M’arricordu di tè quandu, ghjimbata à u pede di u lettu è sempre ingrunchjata da u sonnu, mi curave cù clozapine è basgi magichi.

- « O mà, tombalu ».

Ti guasta è dopu puzzi u sangue seccu è ai u fretu. Tandu ti sussuru una canzona dolce una canzona bassa.

Pizzicu mininu

Rampi rampinu

Ma ùn a senti.

Lucca luccagna

Vai in Balagna

Mi face a paura sai. Un ghjornu t’abbandunerà in un pozzu di sangue. Pienghjerà u to cadaveru dicerà i so rigreti pienghjerà ancu. Ùn vole ghjunghjene custì o mà a sai ùn hè colpa soia.

Ma ti creperà.

- « O mà, tombalu ».

Tombalu di spinu per ùn avè à crucià u so surrisu zitellinu è risicà di rinuncià.

I mignoculi ùn meritavanu quessa.

Scordati di quale ellu hè.

- « O mà, tombami ».


Nuvella di Laure Vincenti

Pittura di Colette Cohen-Abbate